Unseri Clique

Mir sin e Fasnachtsclique us Basel und uns gits syt em Johr 1947. Mir hän in jedem Johr syt unserer Gründig mit unserem Sujetwaage, wo mir immer wieder ufs Neue baue und gstalte, am Cortège teilgnoh. Mir sin e bunti Gruppe vo sächszäh Aggtivmitglieder unterschiedlichen Alters und Hintergrund mitere gmeinsame Liideschaft für d'Basler Fasnacht!

S'Highlight vo unserem Cliquejohr isch natyrligg d Basler Fasnacht, wo Du uns am Cortège uf unserem Waage oder zobe uf dr Gass oder in unserem schöne Cliquelokal, dr Hööli, im Pfäffergässli 5 aträffe chasch. Aber au under em Johr pfläge mir unsers Cliqueläbe. Ab Herbscht träffe mir uns jede Monet eimol in dr Hööli für e Hogg, und baue zirka ab Oktober in unsere Waagebauhalle in Dornach an unserem Sujetwaage für die näggschti Fasnacht. Dört findet denn au traditionell am Sunntig vor em Morgestraich d'Vernissage vo unserem Waage statt. Und will mir als Waageclique nid aktiv an de Bummelsunntige nach dr Fasnacht teilnämme, gön mir jede Summer uf unsere eigene "Bummel" und mache e Usflug, was e wittere Höhepunkt in unserem Cliquejohr darstellt.

Isch Dis Interässe gweggt und möchtisch Du gärn mehr über d'Schnäderänte erfahre? Denn bisch härzlich yyglaade, Di durch unseri neui Homepage z'klicke!